اسلام آباد (آن لائن) وزیر اعظم شہباز شریف سے اپوزیشن لیڈر راجا ریاض نے ملاقات کی اور نئے چیئرمین نیب کے ناموں پر مشاورت کی۔ذرائع نے بتایا کہ جمعے کو دونوں کی ملاقات وزیر اعظم ہائوس میں ہوئی‘ انہوں نے چیئرمین نیب کی تعیناتی کے لیے موزوں شخصیت کی نامزدگی پر اتفاق کیا‘ ملاقات میں ابتدائی طور پر سابق بیورو کریٹ فواد حسن فواد، سابق چیئرمین نیب قمر الزماں اور سابق ڈی جی ایف آئی اے بشیر میمن اور عرفان قادر شیخ کے ناموں پر مشاورت کی گئی۔ ذرائع کے مطابق دونوں رہنمائوں نے کسی ریٹائرڈ جج کے بجائے ریٹائرڈ بیورو کریٹ کو چیئرمین لگانے پر اتفاق کیا ہے‘ وزیراعظم اور اپوزیشن لیڈر ان 4 ناموں پر اپنی اتحادی جماعتوں سے مشاورت کریں گے۔ بعدازاں میڈیا سے گفتگو کرتے ہوئے راجا ریاض نے کہا ہے کہ وزیر اعظم کے ساتھ ملاقات مثبت رہی ہے‘ ملک کی سیاسی و معاشی صورت حال سمیت نئے چیئرمین نیب کے تقرر پر معاملے تفصیلی مشاورت ہوئی‘آئین و قانون کے مطابق 2 جون تک چیئرمین نیب کا تقرر کرلیں گے‘ ابھی کوئی نام فائنل نہیں ہوا تاہم جن ناموں پر مشاورت ہوئی ہے وہ سب عزت دار اور قابل احترام ہیں۔
