روسی وزیر خارجہ سرگی لاوروف نے کہا ہے کہ ہماری حدود کے اطراف بالخصوص بالٹک ریاستوں اور پولینڈ میں نیٹو کی سرگرمیاں باعث تشویش ہیں۔
لاوروف نے روس اور بیلاروس کے درمیان سفارتی تعلقات کی 30 ویں سالگرہ کے موقع پر منسک کا دورہ کیا ۔
بیلاروس کے وزیر خارجہ ولادیمیر ماکی سے ملاقات کے بعد ایک مشترکہ پریس کانفرنس کے دوران لاوروف نے کہا کہ ہماری حدود کے اطراف بالخصوص پولینڈ اور بالٹک ریاستوں میں نیٹو کی سرگرمیاں ہمارے لیے خدشات پیدا کر رہی ہیں، ہمارا مشترکہ موقف یہ ہے کہ اس طرح کی سرگرمیاں اشتعال انگیزی کا سبب بنتے ہوئے کشیدگی کو مزید بڑھاوا دیں گی ۔
روسی وزیر نے کہا کہ یورپی سلامتی تعاون تنظیم نے "ناگزیر مشترکہ سلامتی” کے اصول کی خود ہی دھجیاں اڑا دی ہیں اور مغرب نے اپنی حفاظت کے لیے دیگر ممالک کی سلامتی کو خطرے میں ڈالنے کا شعار اپنالیا ہے ۔
