مریم نواز کو پارٹی کا سینیئر نائب صدر اور پارٹی کا چیف آرگنائزر بنانے کے بعد پارٹی کے سینیئر رہنماؤں میں ایک بے چینی کی صورتحال ہے، اور وہ اس فیصلے سے نالاں ہیں۔
سینیئر صحافی انصار عباسی کے مطابق پارٹی کے ایک سینیئر رہنما اور عہدیدار نے اپنی شناخت کو ظاہر نہ کرنے کی شرط پر بتایا کہ پارٹی کے تمام عہدے شریف خاندان کے پاس ہیں۔
سینیئر رہنما کا کہنا تھا کہ نواز شریف پارٹی کے قائد ہیں، شہباز شریف پارٹی کے صدر اور وزیر اعظم ہیں اور حمزہ شہباز شریف پنجاب اسمبلی میں اپوزیشن لیڈر ہیں، اب مریم نواز کو پارٹی کا سینیئر نائب صدر اورچیف آرگنائزر بنا دیا گیا ہے، یہ اقدام پارٹی کے سینیئر افراد کے لئے تشویش کا باعث ہے۔
سینیئرعہدیدار کا مزید کہنا تھا کہ یہ فیصلہ غیر جمہوری ہے اور اس سے پارٹی میں شریف خاندان کی گرفت مزید مظبوط ہو جائے گی۔ ان کا یہ بھی کہنا تھا کہ مریم نواز کو یہ عہدہ دینے کے حوالے سے پارٹی کے رہنماؤں سے کسی بھی قسم کا کوئی مشورہ نہیں کیا گیا۔
سینیئر رہنما نے افسوس کا اظہار کرتے ہوئے کہا کہ کیا صرف شریف خاندان کے قریبی اور رشتہ دارافراد کا حق ہے کہ حکومت اور پارٹی کے بڑے عہدے اپنے پاس رکھیں؟
یاد رہے کہ مسلم لیگ (ن) کے صدر شہباز شریف نے چند روز قبل مریم نواز کو پارٹی کی سینیئر نائب صدر اور چیف آرگنائزر مقرر کیا تھا، اس فیصلے پر پارٹی کے سینیئر رہنماؤں کی طرف سے ردعمل آنا شروع ہو گیا ہے۔
