اسلام آباد:وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ عمران خان پھر عدالت میں پیش نہیں ہوئے۔ ریلی کی قیادت کرنے کیلئے بالکل ٹھیک ہیں، وہاں ان کو سکیورٹی کا بھی کوئی خدشہ نہیں۔ لیکن جب عدالت بلائے تو صحت اور سکیورٹی کا عذر پیش کرکے حاضری سے استثنی مانگتے ہیں۔
عدالت سماعت میں وقفے اور تاخیر کے بجائے لاڈلے خان کے خلاف کاروائی کرے۔ان خیالات کااظہار شیری رحمان نے سوموار کے روز ٹوئٹر پر جاری اپنے بیان میں کیا۔
شیری رحمان کا کہنا تھا کہ عمران خان آج پھر سیاسی انتشار پھیلانے کیلئے تیار ہیں لیکن عدالت میں جواب دہی کیلئے تیار نہیں۔ اپنی نام نہاد سیاست کیلئے یہ اپنے کارکنان کی زندگیوں سے کھیل رہے ہیں۔خونی مارچ اور ریلیاں نکالنے والے کیا اپنے کارکنان اور ملک کے خیر خواہ ہیں؟ یہ کارکنان کو اکسا کر خود چھپ جاتے ہیں۔
