اسلام آباد: پی ٹی آئی رہنما شاہ محمود قریشی نے کہا ہے کہ وفاقی وزرا احسن اقبال اور خواجہ آصف مذاکرات میں رکاوٹ پیدا کررہے ہیں۔
یوم مزدور کی مناسبت سے راولپنڈی میں پی ٹی آئی کی ریلی کے موقع پر شاہ محمود قریشی کا میڈیا سے گفتگو کرتے ہوئے کہنا تھا کہ تحریک انصاف آئین پاکستان بچاؤ تحریک کا آغاز کررہی ہے، حکومتی مذاکراتی ٹیم کو ان کی خواہش پر مہلت دی ہے۔
انہوں نے کہا کہ مخصوص طبقہ آئین پاکستان کو روند کر اپنے مذموم مقاصد حاصل کرنا چاہتا ہے۔ سپریم کورٹ نے فیصلے کے ذریعے آئین کی تشریح کردی ہے، آج پی ڈی ایم کے تمام جماعتیں سپریم کورٹ کے فیصلے کے خلاف جارہی ہیں۔ ان کا کہنا تھاکہ خواجہ آصف، احسن اقبال مذاکرات کے راستے میں رکاوٹ پیدا کررہے ہیں، مولانہ فضل الرحمان پی ڈی ایم کے صدر ہے وہ بھی مذاکرات سے انکاری ہیں۔
