ممبئی: بھارتی اداکارہ جینیفر بنسیوال نے تارک مہتا کا اُلٹا چشمہ کے پروڈیوسر پر جنسی ہراسگی کا الزام عائد کر دیا۔
بھارتی میڈیا رپورٹ کے مطابق مشہور ٹی وی ڈرامے تارک مہتا کا اُلتا چشمہ کی اداکارہ جینیفر بنسیوال نے ڈرامے کے پروڈیوسر اسیت کمار مودی سمیت دو افراد پر جنسی طور پر ہراساں کرنے کا الزام لگایا ہے۔
جینیفر بنسیوال جو پچھلے 15 سال سے ٹی وی شو میں روشن سنگھ سوڈھی کا کردار ادا کر رہی ہیں، نے کہا ہے کہ انہوں نے 8 اپریل کو متعلقہ حکام بشمول خواتین کے قومی کمیشن اور ممبئی پولیس کو ایک خط بھیجا ہے جس میں انہوں نے پروڈیوسر مودی، پراجیکٹ کے سربراہ سہیل رمانی اور ایگزیکٹو پروڈیوسر جتن بجاج پر انہیں جنسی طور پر ہراساں کرنے کی شکایت کی ہے۔
تاہم پروڈیوسر نے اداکارہ کی جانب سے لگائے گئے الزامات کو مسترد کرتے ہوئے دعویٰ کیا ہے کہ اداکارہ کو بدتمیزی اور بدسلوکی سے پیش آنے کی وجہ سے شو سے نکالا گیا تھا اور اب وہ اُنہیں اور شو کو بدنام کرنے کی کوشش کر رہی ہیں جس پر وہ جینیفر کے خلاف قانونی کارروائی کریں گے۔
