اپنی آنکھیں ایشوریا رائے جیسی کرنا چاہتے ہیں تو مچھلی کھائیں؛ بھارتی وزیر

نئی دہلی: بھارتی ریاست مہاراشٹرا کے وزیر برائے قبائلی امورجات وجے کمار گاوت نے نوجوانوں کو مچھلی کھانے کی ترغیب دینے کے لیے ایک انوکھا مشورہ دے ڈالا۔

بھارتی میڈیا کے مطابق سوشل میڈیا پر مودی سرکار کے ایک وزیر کے مضحکہ خیز بیان کی ویڈیو وائرل ہو رہی ہے جس میں موصوف نے ماہی گیروں کے ایک اجتماع سے خطاب کرتے ہوئے نوجوانوں کو مفت مشورہ دے ڈالا۔

بھارتیہ جنتا پارٹی سے تعلق رکھنے والے وزیر وجے کمار گاوت نے کہا کہ جو لوگ باقاعدگی سے مچھلی کھاتے ہیں ان کی آنکھیں انڈیا کی سابق ملکہ حسن اور فلمی دنیا کی کامیاب اداکارہ ایشوریا رائے بچن کی طرح خوبصورت ہوجاتی ہیں۔

Maharashtra’s Minister of Tribal Welfare Vijaykumar Gavit said that actress Aishwarya Rai had "beautiful eyes” and "glowing skin” because of her fish-eating habit. pic.twitter.com/6zwHl5TIKS

— Charuhaas parab (@charuhaasparab) August 21, 2023

مودی سرکاری کے وزیر برائے قبائلی امور نے مزید کہا کہ ایشوریہ رائے کی طرح آپ کی آنکھیں بھی ہو گئیں تو جسے آپ دیکھیں گے وہ آپ کا ہوجائے گا۔

وزیر وجے کمار نے یہ دعویٰ بھی کیا کہ ایشوریہ رائے ساحلی علاقے میں پلی بڑھی ہیں اور روزانہ مچھلی کھاتی تھیں اور اسی لیے اتنی پُرکشش ہیں۔

وجے کمار گاوت نے مزید کہا کہ مچھلی کو روزانہ کی خوراک میں شامل کرنے والوں کی جلد بھی چمکدار ہوجاتی ہیں اور وہ اپنے ہم عمروں سے کم عمر اور خوبصورت دکھائی دیتے ہیں۔

اس بیان پر اپوزیشن رہنماؤں نے وزیر کو اپنی وزارت پر دھیان دینے کا مشورہ دیتے ہوئے کہا کہ اگر ایسا ہوتا تو سارے مچھلی خور ایشوریہ رائے کے ہم شکل ہوتے۔