اسلام آباد:نگران وفاقی وزیر اطلاعات و نشریات مرتضی سولنگی نے کہا ہے کہ نگران حکومت تمام بین الاقوامی معاہدوں کا احترام کرتی ہے اور ان پر عمل درآمد جاری رکھے گی،پچھلی حکومت کے فیصلوں پر بھی قانون کے مطابق عمل درآمد کریں گے تمام بین الاقوامی معاہدوں پر عملدرآمد جاری رکھے گی۔
مرتضی سولنگی نے کہاکہ حکومتی اخراجات کم کرنے، سرمایہ کاری کو فروغ دینے، سرمایہ کاری کی راہ میں حائل رکاوٹوں کو دور کرنے سمیت اسمگلنگ کی روک تھام کے لئے اقدامات اٹھائے جا رہے ہیں۔
انہوں نے کہا کہ خصوصی سرمایہ کاری سہولت کونسل کے تین بڑے مقاصد انفارمیشن ٹیکنالوجی، مائننگ اور زراعت پر توجہ مرکوز کرنا ہے۔ایس آئی ایف سی کی ایپکس کمیٹی کے اجلاس میں حکومتی اخراجات اور گردشی قرضوں کو کم کرنے، نجکاری کے عمل کو بہتر بنانے اور اسمگلنگ کی روک تھام سمیت دیگر مسائل پر غور ہوا۔
