نیو یارک: اسرائیل کے غزہ کے اسپتال پر اچانک حملے پر سلامتی کونسل کا ہنگامی اجلاس طلب کرلیا گیا۔
بین الاقوامی خبر رساں اداروں کے مطابق صہیونی ریاست کے غزہ میں اسپتال پر فضائی بم باری کے سلسلے میں اقوام متحدہ کی سلامتی کونسل کا ہنگامی اجلاس طلب کرلیا گیا ہے۔ اجلاس روس اور متحدہ عرب امارات نے بدھ 18 اکتوبر کو صبح 10 بجے ہنگامی طور پر طلب کرنے کی اپیل کی ہے۔
واضح رہے کہ اسرائیل نے فلسطینی اسپتال پر اچانک بم باری کردی، جس کے نتیجے میں 800 سے زائد فلسطینی شہید ہو گئے جب کہ زخمیوں کی تعداد بھی سیکڑوں میں بتائی جاتی ہے۔ اسپتال میں غزہ پر اسرائیلی حملے میں پہلے سے شہید ہونے والوں کی لاشیں اور زخمیوں کی بڑی تعداد بھی زیر علاج تھی۔
عرب میڈیا کے مطابق اسپتال میں زیر علاج فلسطینیوں میں خواتین اور بچے بھی شامل تھے، جنہیں اسرائیلی فوج نے بم باری کا نشانہ بنایا۔
