پشاور: پی ٹی آئی کے سابق صوبائی وزیر کامران بنگش کو گرفتار کرلیا گیا۔
نجی ٹی وی کی رپورٹ کے مطابق پولیس نے تحریک انصاف کے سابق صوبائی وزیر کامران بنگش کو گرفتار کرلیا جب کہ انسپکٹر جنرل پولیس خیبر پختونخوا نے پشاور ہائی کورٹ کو پی ٹی آئی رہنماؤں کو گرفتار نہ کرنے کی یقین دہانی کروائی تھی۔
ذرائع کے مطابق پی ٹی آئی رہنما کو موٹروے ٹول پلازہ کے قریب ان کی رہائش گاہ سے گرفتار کیا گیا ہے۔ کامران بنگش کے گھر پر موجود ہونے کی اطلاع پر پولیس نے کارروائی کی۔ چھاپا مارے جانے کے موقع پر خواتین پولیس اہل کار بھی ان کی رہائش گاہ میں داخل ہوئیں۔
پولیس کا کہنا ہے کہ کامران بنگش کو 9 مئی ہنگامہ آرائی اور جلاؤ گھیراؤ کے کیس میں گرفتار کیا گیا ہے، ان کے خلاف تھانہ کابلی میں نومئی کے واقعات میں ملوث ہونے کا مقدمہ درج تھا۔
