نئی دہلی: ورلڈ کپ کے میگا ایونٹ میں پاکستانی کرکٹ ٹیم کا سفر ختم ہوگیا، جس کے بعد ٹیم کی واپسی کا شیڈول جاری کردیا گیا ہے۔
نجی ٹی وی کی رپورٹ کے مطابق بھارت میں جاری کرکٹ کے عالمی کپ کے اہم میچ میں انگلینڈ سے شکست کے بعد قومی ٹیم کا میگا ایونٹ میں سفر تمام ہوا، جس کے بعد کھلاڑیوں اور آفیشلز کی پاکستان واپسی کا شیڈول جاری کردیا گیا ہے۔
ذرائع کے مطابق پاکستانی ٹیم کے کھلاڑی کولکتہ سے 2 مختلف پروازوں کے ذریعے دبئی سے ہوتے ہوئے پاکستان پہنچیں گے۔ قومی کھلاڑی پیر 13 نومبر کو اسلام آباد، لاہور اور سیالکوٹ پہنچیں گے جب کہ فاسٹ بالر حسن علی فی الحال بھارت میں قیام کریں گے اور 22 نومبر کو واپس آئیں گے۔
نجی ٹی وی کے مطابق ڈائریکٹر مکی آرتھر بھی 3 دن دبئی میں رہنے کے بعد 16 نومبر کو لاہور آئیں گے۔
واضح رہے کہ آئی سی سی ورلڈ کپ میں قومی ٹیم کو 9 لیگ میچز میں سے 5 میں شکست اور 4 میں کامیابی ملی۔ پاکستان نے پوائنٹس ٹیبل پر پانچویں پوزیشن کے ساتھ ٹورنامنٹ کا اختتام کیا ہے۔
