اسلام آباد: ایپکس کمیٹی کا اجلاس نگراں وزیراعظم انوار الحق کاکڑ کی صدارت میں ہوا، جس میں آرمی چیف جنرل سید عاصم منیر نے حکومتی معاشی اقدامات کی حمایت کی۔
خبر رساں اداروں کے مطابق ایپکس کمیٹی اجلاس سے متعلق جاری اعلامیے میں بتایا گیا ہے کہ اجلاس میں آرمی چیف، وزرا اور اعلیٰ سطح کے سرکاری افسران نے شرکت کی جب کہ کمیٹی نے متفقہ طور پر دوست ممالک کے ساتھ رابطوں کے لیے مختلف اقدامات کی منظوری دی۔
ایپکس کمیٹی کے اجلاس میں اقدامات کے تحت تصور کیے گئے مختلف منصوبوں پر تیزی سے عملدرآمد کی ہدایت بھی کی گئی جبکہ اعلامیے میں کہا گیا ہے کہ وزیر اعظم نے تعاون کے ممکنہ شعبوں کی نشاندہی کرنے کے لیے متعلقہ وزارتوں کی کوششوں کو سراہا۔
وزیراعظم نے تمام اسٹیک ہولڈرز کو طویل المدتی اقتصادی منافع کے تصور کے حصول کی ہدایت کی۔ اس موقع پر آرمی چیف نے حکومت کے معاشی اقدامات کی حمایت کے لیے پاک فوج کے غیرمتزلزل عزم کی یقین دہانی بھی کرائی۔
