اسلام آباد: قومی اور صوبائی اسمبلیوں کے 21 حلقوں میں ضمنی انتخابات کے لیے پولنگ جاری ہے، انتخابات کے پرامن انعقاد کو یقینی بنانے کے لیے سیکیورٹی کے سخت انتظامات کیے گئے ہیں ۔
قومی اسمبلی کی 5، پنجاب اسمبلی کی 12، خیبرپختونخوا اسمبلی کی دو اور بلوچستان اسمبلی کی دو نشستوں پر ضمنی انتخابات ہو رہے ہیں۔
پولنگ بغیر کسی وقفے کے شام 5 بجے تک جاری رہے گی۔ قومی اسمبلی کے پانچ حلقوں کی نشستوں کے لیے کل 47 امیدوار میدان میں ہیں۔
این اے 8 باجوڑ، این اے 44 ڈیرہ اسماعیل خان، این اے 119 لاہور، این اے 132 قصور اور این اے 196 قمبر شہدادکوٹ میں مقابلے ہو رہے ہیں۔
بلاتعطل اور شفاف ووٹنگ کی سہولت کے لیے انتخابی حلقوں میں موبائل نیٹ ورک سروس معطل رہے گی۔
الیکشن کمیشن کی طرف سے قائم کردہ مرکزی کنٹرول روم شکایات کو فوری طور پر نمٹائے گا، انتخابی عمل کے دوران پیدا ہونے والے کسی بھی مسئلے کے بروقت حل کو یقینی بنائے گا۔
