اسلام آباد:وزیر اعظم شہباز شریف نے کہا ہے کہ سعودی عرب کا تجارتی وفد خصوصی سرمایہ کاری سہولت کونسل کے ذریعے بہترین فائدہ اٹھا سکتے ہیں۔
میڈیا رپورٹس کے مطابق وزیر اعظم ہاؤس میں شہباز شریف نے سعودی سرمایہ کاروں اور کاروباری شخصیات کے وفد کے اعزاز میں عشائیہ دیا، جس میں وفاقی وزرا اور پاکستان کی کاروباری برادری نے بھی شرکت کی۔
تقریب سے خطاب کرتے ہوئے وزیر اعظم نے کہا کہ رمضان کے آخری ہفتے میں دوسری بار سعودی عرب میں ولی عہد سے ملاقات ہوئی، سعودی عرب کی معیشت بہت تیزی سے ترقی کرنے والے ممالک میں شامل ہے، زراعت، آئی ٹی، ٹیکنالوجی سمیت کئی شعبوں میں سعودی عرب ترقی کر رہا ہے۔
انہوں نے کہا کہ سعودی عرب ملازمت کے مواقع کے لیے اہم ممالک میں شامل ہے، آج سعودی سرمایہ کار، پالیسی سازوں کا وفد پاکستان آیا ہوا ہے، سعودی عرب پاکستان کا 7 دہائیوں سے ساتھ دے رہا ہے اور اس نے ہر مشکل میں پاکستان کا ساتھ دیا ہے۔
