اسلام آباد (آن لائن) گزشتہ 6ماہ کے دوران پاکستان میں دہشت گردی کے واقعات میں مجموعی طور پر 474افراد جاں بحق ہوئے ہیں جبکہ دہشت گردی کے واقعات میں 20 فیصد کمی ہوئی ہے، ماہ جون میں 69 حملوں میں 60 افراد مارے گئے۔ اسلام آباد میں قائم تھنک ٹینک، پاکستان انسٹی ٹیوٹ فار کانفلیکٹ اینڈ سیکورٹی اسٹڈیز (پی آئی سی ایس ایس) کی رپورٹ کے مطابق عسکریت پسندوں نے جون 2024ء کے دوران ملک بھر میں 69 حملے کیے ان حملوں کے نتیجے میں 60 افراد مارے گئے، جن میں سیکورٹی فورسز کے 33 اہلکار، 26 عام شہری اور ایک جنگجو شامل تھا جبکہ 65 افراد زخمی ہوئے، جن میں 33 عام شہری، 31 سیکورٹی فورسز کے اہلکار اور ایک عسکریت پسند شامل ہے۔
