سابق کپتان اور آل راؤنڈر شعیب ملک نے کہا ہے کہ انہیں اب مستقبل میں قومی ٹیم کی طرف سے کھیلنے میں کسی قسم کی کوئی دلچسپی نہیں ہے ۔
نجی ٹی وی چینل کو دیئے گئے انٹرویو میں قومی کرکٹ ٹیم کے اسٹار آل راؤنڈر شعیب ملک نے کہا کہ میں بہت مطمئن اور خوش ہوں ،پاکستان کیلئے ساری زندگی کرکٹ کھیلی اور خوب لطف اندوز ہوا، مجھے اب قومی ٹیم کی جانب سے کھیلنے میں کوئی دلچسپی نہیں رہی ۔
شعیب ملک نے کہا کہ میں نے دو فامیٹ سے پہلے ہی ریٹائرمنٹ کا اعلان کردیا ہے، صرف ٹی20 فارمیٹ میں ایسا ہے جس میں ریٹائرمنٹ کا اعلان نہیں کیا تھا ، اب اگر ریٹائر ہوا تو کوئی کرکٹ نہیں کھیلوں گا۔ میں ابھی مکمل طور پر کرکٹ سے ریٹائرمنٹ کا اعلان نہیں کر رہا ہوں مگر ہاں میں لیگز کھیل رہا ہوں اور جب جب موقع ملے گا میں لیگز کھیلتا رہوں گا۔
سابق کپتان نے کہا کہ قومی ٹیم کی کوچنگ میں مجھے کوئی دلچسپی نہیں، البتہ بطور مینٹور ڈومیسٹک سطح پر اپنی ضرور خدمات پیش کروں گا، بابر اعظم کو بطور بلے باز اپنی بہترین کارکردگی پر توجہ دینی چاہیے، ٹیم میں سرجری تو تب ہونی چاہیے جب آپ کے پاس بہت کچھ موجود ہو۔
انہوں نے چیمپئنز ٹرافی سے متعلق کہا کہ چیمپئنز ٹرافی کے لیے بھارتی کرکٹ ٹیم کو پاکستان ضرور آنا چاہیے۔
