وزیرِ اطلاعات پنجاب عظمیٰ بخاری نے کہا ہے کہ پشتونوں کے بچوں کو بانی پی ٹی آئی اور بشریٰ بی بی اپنے ناپاک عزائم کے لیے استعمال کررہے ہیں۔
اپنے ایک بیان میں وزیرِ اطلاعات پنجاب عظمیٰ بخاری نے کہا کہ خیبرپختونخوا میں امن و امان کی صورتحال تشویشناک حد تک پہنچ گئی ہے بنوں، کرم، خیبر، اور ڈیرہ اسماعیل خان میں آئے روز دہشت گردی کے واقعات ہو رہے ہیں۔
عظمیٰ بخاری نے کہا کہ تیسری بغاوت ناکام ہونے پر پشتون کارڈ کھیلنا قابلِ مذمت ہے، جو جماعت 12 سال سے کے پی کے میں اقتدار میں ہے اُسے صوبے میں امن نہیں چاہیے، جب تمام تحریکیں تمام کارڈ پٹ گئے تو پشتون کارڈ کو لسانیت کے طور استعمال کیا جارہا ہے۔
ان کا کہنا تھا کہ علی امین کے پاس بانی پی ٹی آئی کی کال پر اسلام آباد پر حملہ آور ہونے کیلئے وقت اور وسائل ہیں، ان کے پاس پشتون قوم کے بہتر مستقبل کے لیے وقت ہی نہیں،علی امین کو صوبے کے لوگوں کے مستقبل سے دلچسپی نہیں تو مستعفی ہوجائیں۔
انہوں نے کہا کہ فوج، پولیس اور دیگر سیکیورٹی فورسز ارضِ پاک کے دفاع کیلئے جانوں کے نذرانے پیش کر رہے ہیں جبکہ فتنہ پارٹی انہی سیکیورٹی فورسز کے خلاف گھٹیا مہم چلانے میں مصروف ہے، خیبرپختونخوا و کرم میں امن کیلئے آل پارٹیز کانفرنس میں صوبائی حکومت کا شرکت سے انکار شرمناک ہے۔
