اسلام آباد: ہائیکورٹ میں جسٹس طارق جہانگیری کے ڈگری کیس میں اہم پیش رفت سامنے آئی ہے، جہاں کیس کی سماعت کرنے والا بینچ ٹوٹ گیا۔
ذرائع کے حوالے سے نجی ٹی وی کی رپورٹ کے مطابق جسٹس خادم حسین سومرو نے اس کیس کی سماعت سے معذرت کرلی ہے، جس کے نتیجے میں کارروائی بغیر کسی فیصلے کے ملتوی کر دی گئی۔ یہ پیش رفت اس وقت سامنے آئی جب اسلام آباد بار ایسوسی ایشن کی جانب سے فریق بننے کی متفرق درخواست سماعت کے لیے مقرر تھی۔
عدالتی ذرائع کے مطابق چیف جسٹس سرفراز ڈوگر اور جسٹس خادم حسین سومرو پر مشتمل ڈویژن بینچ کیس کی سماعت کر رہا تھا۔ دورانِ سماعت جسٹس خادم حسین سومرو نے وجوہات ظاہر کیے بغیر بینچ میں بیٹھنے سے معذرت کی، جس کے بعد کارروائی فوری طور پر روک دی گئی۔ عدالت نے نئی تاریخ دینے یا بینچ کی ازسرِنو تشکیل کے حوالے سے کوئی اعلان نہیں کیا۔
ذرائع کا کہنا ہے کہ امکان ہے کہ اسلام آباد ہائیکورٹ کا نیا بینچ تشکیل دیا جائے گا جو اس اہم کیس کی سماعت دوبارہ کرے گا، تاہم اس حوالے سے عدالتِ عالیہ کی جانب سے باضابطہ اعلان تاحال سامنے نہیں آیا۔
