لیہ میں نومولود بچے کو رقم کے عوض فروخت کرنے کا سنسنی خیز معاملہ ایک سال بعد منظرعام پر آ گیا، جہاں پولیس نے خاتون کی شکایت پر کارروائی کرتے ہوئے مرکزی ملزم اور اس کے ساتھ ملوث افراد کے خلاف مقدمہ درج کر لیا۔
واقعہ تحصیل کروڑ لعل عیسن میں پیش آیا، جہاں متاثرہ خاتون نے ایف آئی آر میں بیان دیا کہ مقامی اسپتال میں بچے کی پیدائش کے فوراً بعد شوہر نے اسے بتایا کہ نومولود کو طبی مسئلہ ہے اور اسے لیہ اسپتال منتقل کیا جا رہا ہے۔
خاتون کے مطابق جب اُس نے بار بار بچے کی واپسی کا مطالبہ کیا تو شوہر نے الٹا اسے گھر سے ہی نکال دیا۔ کئی ماہ کی کوششوں کے بعد خاتون نے مقدّمہ درج کرایا۔
پولیس کے مطابق تفتیش کے دوران ملزم نے اعتراف کیا کہ اس نے اپنا ہی بچہ 8 لاکھ روپے میں فروخت کیا، جبکہ بچے کو خریدنے والے جوڑے نے بھی معاملے کی تصدیق کر دی ہے۔
حکام کا کہنا ہے کہ ڈی این اے ٹیسٹ مکمل ہونے کے بعد بچے کو والدہ کے حوالے کر دیا جائے گا، جبکہ مرکزی ملزم سمیت نامزد افراد کے خلاف مزید تحقیقات جاری ہیں۔
