کراچی میں مزارِ قائد پر گارڈز کی تبدیلی کی پُروقار تقریب کا انعقاد کیا گیا جہاں پاک فوج کے چاق و چوبند دستے نے بابائے قوم کو سلامی پیش کی۔ تقریب کے مہمانِ خصوصی میجر جنرل افتخار حسین چوہدری (ہلالِ امتیاز) تھے۔
اس موقع پر پاکستان ملٹری اکیڈمی کے کیڈٹس نے مزارِ قائد کے گارڈز کی ذمہ داریاں سنبھالیں۔ تقریب میں اعلیٰ عسکری افسران، معزز شخصیات اور شہریوں کی بڑی تعداد نے شرکت کی۔
دوسری جانب وزیراعظم شہباز شریف نے قائداعظم کے یومِ پیدائش پر اپنے پیغام میں کہا کہ قائداعظم کے سنہری اصول ایمان، اتحاد اور تنظیم ایک درخشاں قومی مستقبل کی ضمانت ہیں۔
وزیراعظم کا کہنا تھا کہ قائداعظم محمد علی جناح کا یومِ ولادت پوری قوم کے لیے تجدیدِ عہد کا موقع ہے اور بابائے قوم نے بلاتفریق رنگ و نسل، مذہبی ہم آہنگی، معاشرتی رواداری اور انصاف جیسے اصولوں کی بنیاد رکھی جو آج بھی ہماری رہنمائی کر رہے ہیں۔
