اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے پنجاب میں شدید دھند کے باعث الرٹ جاری کر دیا ہے۔
این ڈی ایم اے کے مطابق آئندہ 3 روز کے دوران جنوبی اور وسطی پنجاب کے مختلف علاقوں میں شدید دھند چھائے رہنے کا امکان ہے جس کے باعث معمولاتِ زندگی متاثر ہو سکتے ہیں۔
این ڈی ایم اے کا کہنا ہے کہ لاہور، جھنگ، ملتان، خانیوال، میاں چنوں اور ساہیوال میں شدید دھند متوقع ہے، جبکہ اوکاڑہ، پاکپتن، بہاولپور، بہاولنگر، لودھراں اور وہاڑی کے علاقوں میں بھی دھند کی شدت برقرار رہنے کا امکان ہے۔
اس کے علاوہ بالائی سندھ کے بعض علاقوں خصوصاً سکھر کے اطراف دھند چھا سکتی ہے، جبکہ وفاقی دارالحکومت اسلام آباد میں بھی رات اور علی الصبح دھند کے امکانات ظاہر کیے گئے ہیں۔
این ڈی ایم اے نے شہریوں کو غیر ضروری سفر سے گریز، ڈرائیونگ کے دوران احتیاط برتنے اور متعلقہ اداروں کو پیشگی حفاظتی اقدامات یقینی بنانے کی ہدایت کی ہے۔
