وزیرِ مملکت برائے داخلہ طلال چوہدری نے پی ٹی آئی پر الزام عائد کرتے ہوئے کہا ہے کہ قومی پالیسی کے حوالے سے ابہام پیدا کرنا ہی اس جماعت کی حکمتِ عملی ہے۔
میڈیا سے گفتگو کرتے ہوئے طلال چوہدری نے کہا کہ وزیراعلیٰ خیبرپختونخوا یہ بیان دیتے ہیں کہ افغانستان کو دہشت گردی کے ثبوت فراہم کیے جائیں، مگر سوال یہ ہے کہ کیا سہیل آفریدی کو اب تک یہ معلوم نہیں ہو سکا کہ دہشت گردی کہاں سے ہو رہی ہے۔ انہوں نے کہا کہ سال 2025 پاکستان کی تاریخ میں دہشت گردی کے واقعات کے لحاظ سے بدترین رہا، جن میں بڑی تعداد خیبرپختونخوا میں پیش آئی۔
وزیرِ مملکت نے مزید کہا کہ خیبرپختونخوا میں سیف سٹی منصوبے اس لیے قائم نہیں کیے جاتے تاکہ دہشت گردوں کی گرفتاری ممکن نہ ہو۔ طلال چوہدری نے واضح پیغام دیتے ہوئے کہا کہ سیاسی تحریکیں سو بار بھی چلائی جائیں، مگر پاکستان کے خلاف رویہ کسی صورت قابلِ قبول نہیں۔ ان کا کہنا تھا کہ وزیراعلیٰ ہو یا کوئی عام سیاسی رہنما، قومی بیانیے کے منافی بات برداشت نہیں کی جائے گی۔
