راولپنڈی:پاکستان تحریک انصاف کے بانی عمران خان کی صحت سے متعلق تشویش میں مزید اضافہ ہوگیا ہے۔ ان کی اہلیہ بشریٰ بی بی کی بہن مریم ریاض وٹو نے دعویٰ کیا ہے کہ انجیکشن لگائے جانے کے باوجود عمران خان کی متاثرہ آنکھ میں 10 فیصد بھی بہتری نہیں آئی، جس کے باعث ان کی فیملی شدید اضطراب کا شکار ہے۔
سماجی رابطے کی ویب سائٹ ایکس (سابق ٹوئٹر) پر جاری اپنے بیان میں مریم ریاض وٹو نے بتایا کہ آج بشریٰ بی بی سے ان کے اہلِ خانہ کی ملاقات ہوئی جبکہ اس سے قبل بشریٰ بی بی کی عمران خان سے بھی ملاقات کرائی گئی تھی، بشریٰ بی بی نے ایک بار پھر عمران خان کی صحت پر گہری تشویش کا اظہار کیا اور بتایا کہ طبی علاج کے باوجود آنکھ کی حالت میں خاطر خواہ بہتری نہیں آئی۔
مریم ریاض وٹو کا کہنا تھا کہ بشریٰ بی بی کے مطابق انجیکشن لگائے جانے کے باوجود متاثرہ آنکھ میں 10 فیصد تک بھی بہتری نہ آنا ایک سنجیدہ معاملہ ہے، جسے نظر انداز نہیں کیا جا سکتا،اس صورتحال کے پیش نظر یہ انتہائی ضروری ہے کہ عمران خان کو فوری طور پر اپنے ذاتی اور معتمد ڈاکٹروں تک رسائی دی جائے تاکہ ان کا تفصیلی اور آزادانہ طبی معائنہ ہو سکے۔
انہوں نے تحریک انصاف کی قیادت اور کارکنان سے بھی اپیل کی کہ وہ اس معاملے کو عدالتوں، انسانی حقوق کی قومی و بین الاقوامی تنظیموں اور عالمی میڈیا کے سامنے بھرپور انداز میں اٹھائیں، عمران خان کو فوری اور مناسب طبی سہولیات کی اشد ضرورت ہے اور کسی بھی قسم کی تاخیر ان کی صحت کے لیے خطرناک ثابت ہو سکتی ہے۔
دوسری جانب جیل ذرائع نے ملاقاتوں کی تصدیق کرتے ہوئے بتایا ہے کہ آج بشریٰ بی بی اور ان کی فیملی کی ملاقات کرائی گئی، جس میں بشریٰ بی بی کی بیٹی اور بھابی شامل تھیں، یہ ملاقات تقریباً آدھے گھنٹے تک جاری رہی جبکہ اس سے قبل بیرسٹر سلمان صفدر کی ملاقات مکمل ہونے کے بعد بشریٰ بی بی کے اہلِ خانہ کو ملاقات کی اجازت دی گئی۔
جیل ذرائع کا مزید کہنا ہے کہ بانی پی ٹی آئی عمران خان اور ان کی اہلیہ بشریٰ بی بی کی ملاقات بھی آج کرائی گئی، جو تقریباً آدھے گھنٹے تک جاری رہی۔ ملاقات کے دوران دونوں نے ایک دوسرے کا حال احوال پوچھا اور یہ ملاقات جیل کے کانفرنس روم میں کرائی گئی۔
