کیلی فورنیا کے علاقے لیک ٹاہو میں برفانی تودہ گرنے کے نتیجے میں 8 سیاح جان کی بازی ہار گئے جبکہ ایک شخص لاپتا ہے۔
امریکی میڈیا کے مطابق نیواڈا کاؤنٹی شیرف آفس کے شیرف شانن مون نے بتایا کہ سیاح برفانی تودے کی لپیٹ میں آگئے تھے، تاہم 6 افراد کو بحفاظت نکال لیا گیا ہے۔
حکام کا کہنا ہے کہ شمالی کیلیفورنیا کے سیرا نیواڈا پہاڑی سلسلے میں تین روزہ دورے پر آنے والے بعض سیاح اس سے قبل بھی مختلف حادثات میں زخمی ہو چکے تھے۔
ریسکیو حکام کے مطابق سخت موسمی حالات کے باعث ہلاک ہونے والوں کی لاشیں اب تک برف تلے دبی ہوئی ہیں اور فوری طور پر انہیں نکالنا ممکن نہیں۔ واقعے کے بعد علاقے میں مزید تقریباً تین فٹ برف باری ہو چکی ہے جس سے امدادی سرگرمیاں مزید متاثر ہوئی ہیں۔
حکام نے خبردار کیا ہے کہ علاقے میں اب بھی برفانی تودے گرنے کا خطرہ برقرار ہے اور شہری احتیاط برتیں۔
