وزیراعلیٰ پنجاب مریم نواز شریف آج پاکستان میں پہلی مرتبہ متعارف کروائی جانے والی ای ٹیکسی اسکیم کا افتتاح کریں گی۔
اسکیم کے پہلے مرحلے میں 1100 ای وہیکلز فراہم کیے جائیں گے، جن میں خواتین کے لیے 30 فیصد کوٹہ مخصوص ہے اور خواتین ڈرائیوروں کی گاڑیوں کا رنگ الگ رکھا جائے گا۔
اسکیم میں مرد ڈرائیوروں کے لیے 50 فیصد اور خواتین ڈرائیوروں کے لیے 60 فیصد ڈاؤن پیمنٹ حکومت پنجاب ادا کرے گی۔ ساتھ ہی گاڑیوں کی رجسٹریشن، فٹنس ٹیسٹ اور ٹوکن ٹیکس کی فیس بھی حکومت کی جانب سے ادا کی جائے گی، جبکہ واجبات پانچ سالہ آسان اقساط میں دیے جائیں گے۔
ڈرائیورز اور مسافروں کی حفاظت کو یقینی بنانے کے لیے ہر ای ٹیکسی میں پنک بٹن نصب کیا گیا ہے، جو پنجاب سیف سٹی اتھارٹی کے ساتھ منسلک ہوگا۔ اسکیم کی گاڑیاں ان ڈرائیو اور یاننگو کے ساتھ رجسٹرڈ ہوں گی اور پبلک مقامات پر فاسٹ چارجنگ اسٹیشنز بھی فراہم کیے جائیں گے۔
