اسلام آباد میں تعینات برطانیہ کی ہائی کمشنر جین میریٹ نے جمعیت علمائے اسلام (ف) کے سربراہ مولانا فضل الرحمان سے ان کی رہائش گاہ پر ملاقات کی۔
جمعیت علمائے اسلام (ف) کی جانب سے جاری اعلامیے کے مطابق ملاقات کے دوران پاکستان اور خطے کی مجموعی سیاسی و سکیورٹی صورتحال پر تفصیلی تبادلہ خیال کیا گیا۔
اعلامیے میں بتایا گیا کہ گفتگو کے دوران پاکستان، افغانستان، اسرائیل، امریکا، ایران اور خلیجی ریاستوں کی موجودہ سیکورٹی صورتحال بھی زیر بحث آئی۔
ملاقات میں پاکستان اور برطانیہ کے درمیان تعلقات کو مزید مضبوط بنانے پر بھی اتفاق کیا گیا۔
اس موقع پر مولانا فضل الرحمان نے برطانیہ سے مطالبہ کیا کہ وہ خطے میں امن و استحکام کے لیے اپنا مؤثر کردار ادا کرے۔
برطانوی ہائی کمشنر جین میریٹ نے کہا کہ اس حوالے سے ان تمام متعلقہ ممالک سے رابطے جاری ہیں اور برطانیہ اپنا سفارتی کردار ادا کر رہا ہے۔
