اسلام آباد:5G ا سپیکٹرم کی نیلامی کا دوسرا مرحلہ بھی مکمل ہو گیاہے ، ٹیلی کام کمپنیوں نے 2600 میگاہرٹز اور 3500 میگا ہرٹز کی پوزیشنگ کےلیے بولی لگائی۔
2600 میگاہرٹز کی پوزیشنگ کےلیے بولی 3 مراحل میں مکمل کی گئی، 3500 میگاہرٹز کی پوزیشنگ کےلیے بولی 5 مراحل میں مکمل ہوئی۔
وزیرآئی ٹی شزا فاطمہ نے کہا کہ حکومت کو فائیو جی ا سپیکٹرم کی بولی سے510 ملین ڈالر حاصل ہوں گے،پاکستان میں نہ صرف فور جی بہتر ہوگا بلکہ فائیو جی متعارف ہوگا، فائیوجی نیلامی کا عمل کامیابی سے مکمل ہو گیا ہے۔
ان کا کہناتھا کہ 480میگا ہرٹز ا سپیکٹرم فروخت ہو گیا،تینوں آپریٹرز نے اپنے اپنے حساب سے ا سپیکٹرم خریدا،نیلامی کے حوالے سے تمام لوازمات مکمل کیے گئے،آپریٹرز نے بڑھ چڑھ کر حصہ لیا،ملکی تاریخ میں ایسے دن یاد رکھے جاتے ہیں۔
انہوں نے کہا کہ وزیراعظم نے وہ مشکل فیصلے لیے جو کبھی تاریخ میں ہوتے نہیں دیکھے،مشکل فیصلوں کے ثمرات حاصل ہوں گے۔
چیئرمین پی ٹی اے نے نیلامی کو ممکن بنانے کےلیے دو سال دن رات کام کیا،پاکستان میں ساڑھے 700 سے زائد میگاہرٹز ا سپیکٹرم مہیا ہوچکا ہے، فائیو جی سروس کا پائلٹ پراجیکٹ آئندہ ہفتہ شروع کریں گے۔
