لاہور کے صنعتی علاقے قائداعظم انڈسٹریل ایریا میں ایک افسوسناک واقعے نے شہریوں کو گہرے صدمے میں مبتلا کر دیا ہے، جہاں آوارہ کتوں کے حملے میں ایک کم عمر بچی جان کی بازی ہار گئی۔
پولیس حکام کے مطابق واقعہ اس وقت پیش آیا جب 8 سالہ بچی اپنے گھر کے باہر گلی میں کھیل رہی تھی کہ اسی دوران آوارہ کتے نے اچانک اس پر حملہ کر دیا۔ اہل علاقہ نے فوری طور پر بچی کو بچانے کی کوشش کی اور اسے قریبی اسپتال منتقل کیا، تاہم زخموں کی شدت جان لیوا ثابت ہوئی اور وہ جانبر نہ ہو سکی۔
دوسری جانب حکومتی سطح پر آوارہ کتوں کے مسئلے سے نمٹنے کے لیے پالیسیوں پر غور جاری ہے۔ ایک حالیہ اجلاس میں فیصلہ کیا گیا ہے کہ انتہائی خطرناک، ناقابلِ علاج اور شدید زخمی کتوں کے حوالے سے انسانی بنیادوں پر کارروائی کی جا سکتی ہے، جبکہ مجموعی طور پر آوارہ کتوں کی آبادی کو کنٹرول کرنے کے لیے نس بندی کے طریقہ کار کو اپنایا جائے گا۔
حکام کے مطابق اینیمل برتھ کنٹرول پالیسی کے تحت کتوں کو مارنے پر عمومی پابندی عائد ہے، جس کے باعث مستقل حل کے طور پر نس بندی کے ذریعے آوارہ کتوں کی بڑھتی ہوئی تعداد پر قابو پانے کی حکمتِ عملی اختیار کی جا رہی ہے۔
ماہرین کا کہنا ہے کہ اس مسئلے کے مؤثر حل کے لیے مربوط اقدامات اور عوامی آگاہی بھی ناگزیر ہیں تاکہ مستقبل میں ایسے افسوسناک واقعات سے بچا جا سکے۔
