وفاقی وزیر داخلہ محسن نقوی نے کہا ہے کہ امریکی نائب صدر جے ڈی وینس سمیت پاکستان آنے والے دیگر اعلیٰ امریکی حکام کو خصوصی مہمانوں کا درجہ دیا جائے گا۔
اسلام آباد میں امریکی سفیر نیٹلی بیکر سے ملاقات کے دوران مشرق وسطیٰ کی صورتحال اور حالیہ جنگ بندی کے بعد پیدا ہونے والی پیش رفت پر تفصیلی گفتگو ہوئی۔ اس موقع پر امریکی سفیر نے پاکستان کے سفارتی کردار کو سراہتے ہوئے جنگ بندی کے عمل کا خیر مقدم بھی کیا۔
ذرائع کے مطابق ملاقات میں اسلام آباد میں ہونے والے آئندہ مذاکرات کے انتظامات پر بھی بات چیت کی گئی، جس میں مختلف فریقین کی شرکت متوقع ہے۔
محسن نقوی نے بتایا کہ غیر ملکی وفد کی آمد کے موقع پر سکیورٹی کے فول پروف انتظامات کیے گئے ہیں اور اس حوالے سے جامع سکیورٹی پلان تیار کر لیا گیا ہے تاکہ تمام سرگرمیاں محفوظ ماحول میں مکمل ہو سکیں۔
