امریکا نے مشرق وسطیٰ کے اہم اتحادی ممالک کو اسلحہ اور فوجی آلات فروخت کرنے کی منظوری دے دی ہے، جس کی مجموعی مالیت 8 ارب 60 کروڑ ڈالر بنتی ہے۔
امریکی محکمہ خارجہ کے مطابق کویت کو تقریباً ڈھائی ارب ڈالر مالیت کا بیٹل کمانڈ سسٹم اور متعلقہ آلات فراہم کیے جائیں گے، جبکہ اسرائیل کو 99 کروڑ 24 لاکھ ڈالر کے ایڈوانسڈ پریسیژن کِل ویپن سسٹم کی منظوری دی گئی ہے۔
اسی طرح قطر کو 4 ارب ایک کروڑ ڈالر مالیت کے پیٹریاٹ میزائل سسٹمز فراہم کیے جائیں گے، جب کہ متحدہ عرب امارات کو 14 کروڑ 76 لاکھ ڈالر کے ایڈوانسڈ پریسیژن کِل ویپن فروخت کیے جائیں گے۔
امریکی حکام کے مطابق اس اقدام کا مقصد خطے میں دفاعی صلاحیت کو مضبوط بنانا اور اتحادی ممالک کی سکیورٹی ضروریات کو پورا کرنا ہے، تاہم ماہرین کے نزدیک اس سے خطے میں کشیدگی میں اضافے کا خدشہ بھی پیدا ہو سکتا ہے۔
