دکی: بلوچستان کے ضلع دکی میں کوئلہ کان میں مٹی کا تودہ گرنے کے بعد پھنسے مزدوروں کو نکالنے کے لیے جاری ریسکیو آپریشن مکمل کر لیا گیا ہے، جس میں 5 کان کنوں کو زندہ جبکہ ایک کو مردہ حالت میں نکالا گیا۔
ڈسٹرکٹ انسپکٹر آف مائینز کے مطابق گزشتہ رات کوئلے کی کان میں اچانک مٹی کا تودہ گرنے سے 6 کان کن اندر پھنس گئے تھے، جس کے بعد فوری طور پر ریسکیو آپریشن شروع کیا گیا۔
حکام کے مطابق ابتدائی 14 گھنٹوں کی مسلسل کوششوں کے بعد ایک کان کن کو زندہ نکال لیا گیا، جس کے بعد مزید ٹیمیں طلب کر کے ریسکیو کارروائی کو تیز کیا گیا۔
تقریباً 20 گھنٹے جاری رہنے والے آپریشن کے دوران مزید 4 کان کنوں کو بھی بحفاظت باہر نکال لیا گیا، تاہم آخری مرحلے میں چھٹے کان کن کی لاش برآمد ہوئی۔
حکام کا کہنا ہے کہ یہ افسوسناک واقعہ اس وقت پیش آیا جب کان کن تقریباً 3 ہزار فٹ گہری کان میں کام میں مصروف تھے۔ مقامی انتظامیہ کے مطابق واقعے کی وجوہات جاننے کے لیے مزید تحقیقات جاری ہیں۔
