کشتواڑ/کشتواڑ ضلع کے پلماڑعلاقے کے پاتھی محل میں ہفتہ کے روز ایک تیل ٹینکر سڑک سے پھسل کر الٹ گیا، جس کے نتیجے میں ٹینکر میں سوار دو افراد موقع پر ہی جاں بحق ہوگئے۔
ایک سینئر پولیس افسر نے بتایا کہ حادثہ اس وقت پیش آیا جب تیل ٹینکر مذکورہ علاقے سے گزر رہا تھا اور بظاہر ڈرائیور کے قابو سے باہر ہوکر سڑک سے پھسل گیا اور الٹ گیا۔
انہوں نے بتایا کہ ٹینکر میں سوار دونوں افراد کی موقع پر ہی موت واقع ہوگئی، تاہم فی الحال ان کی شناخت نہیں ہوسکی ہے۔
حادثے کی اطلاع ملتے ہی پولیس اور متعلقہ ٹیمیں موقع پر پہنچ گئیں اور ضروری کارروائی شروع کردی۔ حادثے کی وجوہات سے متعلق مزید تفصیلات کا انتظار ہے۔
