آزاد کشمیر: نئے صدر کی دوڑ میں مضبوط نام سامنے آ گئے، ترقیاتی منصوبوں کی رفتار تیز کرنے کی ہدایت

آزاد جموں و کشمیر میں نیا صدر منتخب کرنے کے لیے سیاسی عمل تیز ہو گیا ہے، جبکہ وفاقی سطح پر خطے کی ترقیاتی ترجیحات اور فلاح و بہبود کے منصوبوں کا بھی جائزہ لیا جا رہا ہے۔

ذرائع کے مطابق آزاد کشمیر کے نئے صدر کے انتخاب کے لیے ڈاکٹر نجیب نقی اور مسلم لیگ (ن) آزاد کشمیر کے صدر شاہ غلام قادر مضبوط امیدواروں کے طور پر سامنے آئے ہیں۔ رپورٹس کے مطابق ڈاکٹر نجیب نقی کو اس عہدے کے لیے انتہائی مضبوط امیدوار قرار دیا جا رہا ہے۔ ذرائع نے بتایا ہے کہ مسلم لیگ (ن) کے قائد نواز شریف نئے صدر کے نام کا حتمی فیصلہ کریں گے، جبکہ صدر کا انتخاب 29 ستمبر تک متوقع ہے۔

دوسری جانب، نائب وزیراعظم اسحاق ڈار کی زیر صدارت آزاد کشمیر کی ترقیاتی ترجیحات کا جائزہ لینے کے لیے ایک اہم اجلاس منعقد ہوا۔ اجلاس میں زیر بحث ترقیاتی منصوبوں اور اقدامات پر جلد از جلد عملدرآمد کی ضرورت پر زور دیا گیا۔ نائب وزیراعظم نے کہا کہ آزاد جموں و کشمیر کے عوام کی ترقی اور فلاح و بہبود حکومت کی اہم ترجیحات میں شامل ہیں۔ اس اجلاس میں وزیراعظم کے معاون خصوصی طارق باجوہ، سیکریٹری امور کشمیر و گلگت بلتستان، چیف سیکرٹری آزاد جموں و کشمیر سمیت وفاقی اور آزاد کشمیر حکومت کے اعلیٰ حکام نے شرکت کی۔