کراچی: اورنگی ٹاؤن سیکٹر 11 ایل بلاک کے قریب اسکول کی دیوار گرگئی جس میں 5 افراد جاں بحق ہوگئے۔
ابتدائی اطلاع کے مطابق اورنگی ٹاؤن بلاک ایل فٹبال گراؤنڈ بلدیہ اسکول کے قریب دیوار گرنے سے5 افراد جاں بحق جبکہ متعدد افراد زخمی ہوگئے۔
جاں بحق ہونے والوں کی لاشوں کو عباسی شہید اسپتال منتقل کردیا گیا ہے جبکہ حادثے کے بعد ریسکیو ادارے، ریسکیو 1122 کے رضا کار جبکہ پولیس اور رینجرز کی نفری جائے وقوعہ پہنچ گئی۔
ایس ایس پی ویسٹ کے مطابق اورنگی ٹاؤن مومن آباد میں اسکول کی خستہ حال دیوار گرنے سے 5 افراد جاں بحق ہوگئے۔
ان کا کہنا تھا کہ دیوار گرنے کے حادثے میں 2 افراد زخمی بھی ہوئے ہیں، گورنمنٹ اسکول کی دیوار گرنے سے 7 افراد ملبے تلے دب گئے تھے۔
ایس ایس پی ویسٹ نے بتایا کہ ابتدائی اطلاعات کے مطابق نشئی افراد دیوار سے سریا نکالنے کی کوشش کر رہے تھے۔
