سری نگر/جموں و کشمیر قانون ساز اسمبلی کے اسپیکر عبدالرحیم راتھر نے جمعرات کے روز افسران کی جانب سے متعدد سرکاری گاڑیوں کے مسلسل استعمال پر وزیر ٹرانسپورٹ ستیش شرما کی سخت جواب طلبی کی۔
یہ معاملہ وقفہ سوالات کے دوران اس وقت سامنے آیا جب بی جے پی کے ایم ایل اے رنبیر سنگھ پٹھانیہ نے سوال اٹھایا کہ کیا حکومتِ جموں و کشمیر تمام محکمہ جات میں ’’ایک افسر-ایک گاڑی‘‘کی حد نافذ کرنے کی تجویز رکھتی ہے۔اپنے تحریری جواب میں وزیر ٹرانسپورٹ نے بتایا کہ فی الحال تمام محکمہ جات، پی ایس یوز ، بورڈز اور خودمختار اداروں میں انفرادی افسران کے لیے سرکاری گاڑیوں کی الاٹمنٹ یا رکھنے کی کوئی مخصوص یکساں پالیسی موجود نہیں ہے۔
حکومت نے بتایا کہ ایک “ترمیم شدہ کار پالیسی” زیر غور ہے جس میں “ایک گاڑی-ایک افسر” کے اصول کو متعارف کرانے کی تجویز ہے۔تاہم، مجوزہ پالیسی میں سیکورٹی ضروریات، فیلڈ ڈیوٹیز، اضافی ذمہ داریوں یا چارجز، آپریٹنگ ہنگامی حالات اور مخصوص محکمہ جات یا تنظیموں کی فعال ضروریات کی بنیاد پر استثنیٰ فراہم کیا جائے گا۔حکومت کے مطابق ایک بار منظوری ملنے کے بعد، ترمیم شدہ پالیسی کو متعلقہ محکمہ جات، پی ایس یوز، بورڈز اور خودمختار اداروں میں نافذ کر دیا جائے گا۔
اسپیکر راتھر نے 1 ستمبر 2026 کو اپنے دفتر میں موصول ہونے والی رپورٹ پر کارروائی میں تاخیر پر شرما سے سوال کیا۔راتھر نے کہا، اگر رپورٹ یکم ستمبر 2026 کو آپ کے دفتر پہنچ گئی تھی تو آپ نے آج تک اس پر کوئی کارروائی کیوں نہیں کی اور آپ ہمیں بتا رہے ہیں کہ اس میں مزید دو مہینے لگیں گے؟اسپیکر نے دو محکمہ جات کا چارج سنبھالنے والے افسر کو الگ الگ گاڑیاں فراہم کرنے کے عمل پر بھی سوال اٹھایا۔
راتھر نے پوچھا، دو محکمہ جات کے انچارج افسر دو مختلف گاڑیاں استعمال کرنے کی بجائے ایک ہی گاڑی کیوں استعمال نہیں کر سکتے؟اسپیکر کو جواب دیتے ہوئے وزیر شرما نے کہا کہ حکومت اس معاملے پر غور کرے گی اور اسے ’’قدیم روایت‘‘قرار دیا۔ شرما نے کہا، ہم اس کا جائزہ لیں گے۔ یہ ایک پرانا مسئلہ ہے۔ میں کل تفصیلات کے ساتھ آپ کے پاس واپس آؤں گا۔تاہم، راتھر نے سوال کیا کہ اگر کوئی موجودہ طریقہ کار غلط پایا جائے تو کیا اسے بدلا نہیں جا سکتا؟
اسپیکر نے پوچھا، اگر پرانی روایت غلط ہے تو کیا آپ اسے درست نہیں کر سکتے؟ کیا آپ اس اجلاس میں ہمیں تفصیلات فراہم کرنے جا رہے ہیں؟شرما نے ایوان کو یقین دلایا کہ وہ تفصیلات کے ساتھ واپس آئیں گے۔
