غلام نبی رینہ
سرینگر/ضلع گاندربل میں کلن اور رائل کے درمیان جنگلاتی علاقے میں ٹریکنگ کے دوران راستہ بھٹکنے کے بعد لاپتہ ہونے والے سرینگر کے دو لڑکوں کو جمعہ کی صبح رائل پل کے قریب تلاش کر لیا گیا۔ایک افسر نے بتایا کہ لڑکوں کے لاپتہ ہونے کی اطلاع ملنے کے بعد اسٹیٹ ڈیزاسٹر رسپانس فورس (ایس ڈی آر ایف) کی گنڈ یونٹ، پولیس اسٹیشن گنڈ اور ڈائل 112 کی ٹیموں نے مشترکہ تلاشی کارروائی شروع کی۔انہوں نے بتایا کہ دونوں لڑکوں نے جمعرات کو جنگل میں راستہ بھٹکنے کے بعد ہنگامی ہیلپ لائن ڈائل 112 کے ذریعے مدد طلب کی تھی۔
افسر کے مطابق، تلاشی ٹیموں نے جمعہ کی صبح دونوں لڑکوں، جن کی شناخت حذیر اور مینان کے طور پر ہوئی ہے، کو کلن سے رائل گاؤں کی جانب رائل پل کے قریب تلاش کر لیا۔انہوں نے مزید بتایا کہ دونوں لڑکوں سے پوچھ گچھ کی جا رہی ہے، جبکہ اس معاملے میں مزید تفصیلات کا انتظار ہے۔
