نئی دہلی/ٹاٹا گروپ کی ہوائی سروس کمپنی ایئر انڈیا اور اس کی مکمل ملکیت والی ذیلی کمپنی ایئر انڈیا ایکسپریس نے سعودی عرب جانے والی اپنی تمام پروازیں 24 اکتوبر تک منسوخ کر دی ہیں۔ایئر انڈیا نے ہفتے کے روز سوشل میڈیا پر ایک پوسٹ میں کہا، موجودہ حالات کے پیشِ نظر ایئر انڈیا اور ایئر انڈیا ایکسپریس نے 24 اکتوبر 2026 تک جدہ، ریاض اور دمام کے لیے اپنی پروازوں کو عارضی طور پر معطل کر دیا ہے۔ایئر لائنز نے ایک دن پہلے ہی 20 اکتوبر تک سعودی عرب جانے والی اور وہاں سے آنے والی اپنی تمام پروازیں منسوخ کرنے کا اعلان کیا تھا۔
پوسٹ میں کہا گیا ہے کہ جن مسافروں نے 15 اکتوبر 2026 یا اس سے پہلے بکنگ کرائی ہے اور جن کی سفر کی تاریخیں 9 اکتوبر سے 25 اکتوبر 2026 کے درمیان ہیں، وہ 10 نومبر 2026 تک بغیر کسی اضافی چارجز کے اپنی سفر کی تاریخ تبدیل کر سکتے ہیں۔ جو مسافر دوبارہ بکنگ نہیں کرنا چاہتے، وہ دستیابی کی بنیاد پر خلیج تعاون کونسل (جی سی سی) خطے کے کسی دوسرے اسٹیشن سے اپنا سفر دوبارہ بک کر سکتے ہیں۔ ایسے معاملات میں انہیں اپنے منتخب کردہ نئے روانگی کے مقام تک پہنچنے کا انتظام خود کرنا ہوگا، نیز ویزا اور انٹری سے متعلق تمام ضروری شرائط کو پورا کرنا ہوگا۔
ایئر انڈیا کے مسافر دئی یا دوحہ کے لیے اپنی بکنگ تبدیل کر سکتے ہیں۔ ایئر انڈیا ایکسپریس کے مسافر ابوظہبی، العین، بحرین، دوحہ، دبئی، کویت، مسقط، راس الخیمہ، صلالہ یا شارجہ کے لیے اپنی بکنگ تبدیل کر سکتے ہیں۔ متاثرہ مسافر سفر نہ کرنے کا متبادل منتخب کر کے مکمل ریفنڈ بھی حاصل کر سکتے ہیں۔ایئر انڈیا گروپ نے مسافروں کی مدد کے لیے ہیلپ لائن نمبرز بھی جاری کیے ہیں۔ ایئر انڈیا کے مسافر 91-1169329333 یا 91-1169329999 پر اور ایئر انڈیا ایکسپریس کے مسافر 91-124 6935600 پر رابطہ کر سکتے ہیں۔
