استنبول (انٹرنیشنل ڈیسک) ترکی کی ایک فرم نے سونگار کے نام سے مسلح ڈرون بنالیا، جو ایک مشین گن اور 200 گولیوں سے لیس ہونے کے ساتھ 656 فٹ دورہدف کو باآسانی نشانہ بناسکتا ہے۔ خبررساں اداروں کے مطابق تُرک فوج نے یہ ڈرون خرید لیا ہے اور آیندہ سال اس کی تربیت شروع ہوجائے گی۔ ترک کمپنی اسیسگارڈ کے تیار کردہ ڈرون کو 10 کلومیٹر کی دوری سے بھی چلایا جاسکتا ہے۔ مسلح ہونے کی صورت میں طیارہ 25کلو وزن کے ساتھ 2800 میٹر اونچائی تک پہنچ سکتا ہے۔ اس میں 2کیمرے نصب ہیں، جن میں سے ایک مشین گن کی نال پر نصب ہے جو ہدف پر نشانہ لگاتا ہے۔