صنعا(مانیٹرنگ ڈیسک) یمن میں فوج کی گریجویشن پریڈ پر راکٹ حملے میں 9افراد ہلاک ہو گئے۔ فوجی ترجمان کرنل ماجد الشعابی کے مطابق یہ واقعہ ملک کے جنوبی علاقے الضالح میں پیش آیا ،ہلاک ہونے والوں میں 6فوجی اور 3بچے بھی شامل ہیں،حملے میں 10 افراد زخمی بھی ہوئے ہیں۔ انہوں نے حملے کا الزام ایران کے حمایت یافتہ حوثی باغیوں پر عاید کیا۔ فی الوقت کسی بھی گروپ کی جانب سے اس حملے کی ذمے داری قبول نہیں کی گئی۔بتایا گیا ہے کہ فوجی پریڈ متحدہ عرب امارات کی حمایت یافتہ سیکورٹی بیلٹ فورسز کے اہلکاروں کی تھی جو حوثی باغیوں کے خلاف جنگ میں اہم کردار ادا کر رہے ہیں۔عینی شاہدین کے مطابق راکٹ حملہ فوجی پریڈ کے دوران مہمانوں کے اسٹیج کے پاس ہوا جس کے نتیجے میں شہریوں کی بھی ہلاکتیں ہوئی ہیں۔ سیکورٹی فورسز نے فوری ردعمل دیتے ہوئے جائے وقوع سے حوثی باغیوں کے 3 کارندوں کو بھی گرفتار کرنے کا دعویٰ کیا ہے۔