ریاض (انٹرنیشنل ڈیسک) سعودی دارالحکومت ریاض میں الجنادریہ کے مقام پر خیموں اور دکانوں میں لگنے والی پراسرار آگ بجھنے کے بعد حکام نے واقعے کی تحقیقات شروع کردی۔ محکمہ دفاع نے اس سلسلے میں تفتیشی ٹیم تشکیل دے دی ہے،جس نے کام شروع کردیا ہے۔ سعودی حکام کا کہنا ہے کہ آگ پر قابو پالیا گیا ہے اور خوش قسمتی سے اس دوران کوئی جانی نقصان نہیں ہوا۔ شہری دفاع کے ترجمان لیفٹیننٹ کرنل محمد حمادی نے بتایا کہ جمعہ کے روز لگنے والی آگ نے دیکھتے ہی دیکھتے خیموں اور دکانوں کو اپنی لپیٹ میں لے لیا تھا۔