لاہور: ملک میں مہنگائی کی لہر اور معاشی بدحالی کے خلاف پی ٹی آئی نے کل سے ملک بھر میں احتجاجی تحریک شروع کرنے کا اعلان کردیا۔
لاہور میں میڈیا کے نمائندوں سے گفتگو کرتے ہوئے تحریک انصاف کے رہنما اور سابق وفاقی وزیر فواد چودھری نے کہا ہے کہ مہنگائی اور معیشت کی تباہی کے خلاف احتجاج کیا جائے گا۔ گھروں میں بجلی نہیں، گیس کی قلت ہے، تیل مہنگا ہورہا ہے، اشیائے ضروریہ کی قیمتیں آسمان کو پہنچ چکی ہیں۔
احتجاج کی تفصیل بتاتے ہوئے فواد چودھری کا کہنا تھا کہ ہماری تحریک مختلف مراحل پر مشتمل ہوگی، جس کے پہلے مرحلے میں 3 ہفتوں تک حلقوں میں ایم این ایز اور ایم پی ایز کی سربراہی میں احتجاجی ریلیاں نکالی جائیں گی اور پھر ہم اپنے اگلے لائحہ عمل کا اعلان کریں گے۔
انہوں نے کہا کہ ہم ایک بار پھر سڑکوں پر ہوں گے اور جب تک حکومت نہیں جاتی احتجاج کا سلسلہ وقتاً فوقتاً جاری رہے گا۔ فواد چودھری کا کہنا تھا کہ پورے پاکستان کے لوگ باہر نکلیں اور اپنے حق کے لیے آواز اٹھائیں اور تحریک انصاف کی احتجاجی تحریک کا حصہ بنیں۔