شیخو پورہ:مسلم لیگ ن کی نائب صدرو چیف آرگنائزر مریم صفدر نے کہا ہے کہ عمران خان کی سیاست دفن ہو چکی،جو مشکل وقت سے ڈر کے چھپ جائے اس کو عمران خان کہتے ہیں، جس نے چوری نہیں کی ہوتی وہ اپنی تین تین نسلوں کا حساب دیتا ہے۔
مریم صفدر نے کہاکہ عمران خان رانا ثنااللہ سے ڈر کر چھپ کر چارپائی کے نیچے بیٹھا ہے، میں نے کبھی کسی سیاسی لیڈر کو گرفتار ی کے ڈر سے چھپتے نہیں دیکھا، عمران خان نے زمان پارک والے گھر میں پولیس کے ڈر سے بلٹ پروف کمرہ بنایا، عدالتوں میں پیشی ہو تو عمران خان کہتا ہے میں بزرگ ہوں، میں بیمارہوں۔
انہوں نے کہا کہ عمران کو عدالت بلاتی ہے تو پلاسٹر والی ٹانگ دکھا دیتا ہے اور ریلیوں میں چلا جاتا ہے، عمران سے کوئی پوچھے اگر چوری نہیں کی تو پیشی سے کیوں ڈرتے ہو؟ میں نے عمران کی پابندیاں توڑ کر گاڑیوں کی چھتوں پر کھڑے ہو کر جلسوں سے خطاب کیا۔
ن لیگ کے رہنما کا کہنا تھا کہ جس کا دامن صاف ہو وہ پیشیوں اور تلاشی سے نہیں ڈرتا، گھڑی چور کو ایک ایک پائی کا حساب دینا ہوگا۔
