لاہور: وفاقی وزیر دفاع خواجہ آصف نے کہا ہے کہ تحریک انصاف ( پی ٹی آئی) کی اعلیٰ قیادت ملک دشمن ہے، سیاسی مقاصد اور انارکی کے لیے بیانات دیے جاتے ہیں، یہ چاہتے ہیں کہ کوئی ملک میں نہ آئے ، یہ ایک سوچی سمجھی سازش ہوتی ہے، ان لوگوں کے ساتھ ملک دشمن جیسا سلوک ہونا چاہیں۔
میڈیا سے گفتگو کرتے ہوئے وفاقی وزیر دفاع نے کہاکہ پی ٹی آئی نے 9 مئی کو بھی ملک کی ساخت کو نقصان پہنچانے کی کوشش کی تھی، 9 مئی کے ملزموں کو کڑی سزا ہونی چاہیے تاکہ دیگر لوگ عبرت پکڑیں۔
انہوں نے مزید کہاکہ پی ٹی آئی کی قیادت نے ہمیشہ ملک کو نقصان پہنچانے کے حوالے سے بڑھ چڑھ کر بیانات دیے ہیں، سعودی عرب ہمیشہ ہمارا بہترین دوست رہا ہے، سعودی عرب نے ہر مشکل گھڑی میں پاکستان کی مدد کی ہے، جس پر ہم اُن کے ممنون ہیں۔
