اسلام آباد: حکومت کی جانب سے پیٹرولیم مصنوعات کی قیمتیں مقرر کرنے کا اختیار آئل مارکیٹنگ کمپنیوں کو دینے کی تیاری کی جا رہی ہے۔
خبر رساں اداروں کے مطابق وزیراعظم نے پیٹرولیم مصنوعات کے نرخ مقرر کرنے کا حکومتی اختیار ختم کرنے کی ہدایت کی ہے اور یہ اختیار اب آئل مارکیٹنگ کمپنیوں کو دینے کی تیاری کی جا رہی ہے۔
پیٹرولیم مصنوعات کی قیمتوں کو ڈی ریگولیٹ کرنے کے حوالے سے وزیر پیٹرولیم نے کل جمعرات کے روز اہم اجلاس طلب کرلیا ہے۔
واضح رہے کہ حکومت نے آئل مارکیٹنگ کمپنیوں کو پیٹرولیم مصنوعات کی مرحلہ وار قیمتیں مقرر کرنے کے لیے اختیار دینے پر کام شروع کردیا ہے، اس حوالے سے آئل اینڈ گیس ریگولیٹری اتھارٹی (اوگرا) کے چیئرمین کو پیٹرولیم مصنوعات کے نرخ ڈی ریگولیٹ کرنے کے نتائج اور لائحہ عمل تیار کرنے کی ہدایت کی گئی ہے۔
رپورٹ میں کہا گیا ہے کہ پیٹرولیم مصنوعات کی قیمتیں ڈی ریگولیٹ کرنے کا حتمی فریم ورک تیار کرکے وزیراعظم کو پیش کیا جائے گا۔
واضح رہے کہ پیٹرولیم ڈیلرز نے آئل مارکیٹنگ کمپنیوں کو قیمتیں مقرر کرنے کااختیار دینے کی مخالفت کی تھی اور مؤقف اختیار کیا تھا کہ کھلا اختیار ملنے پر آئل مارکیٹنگ کمپنیوں کی جانب سے ناجائز منافع خوری کا خدشہ ہے۔