نیپال کے دارالحکومت کھٹمنڈو میں تین دن قبل طیارے کے حادثے میں 18 افراد مارے گئے تھے جبکہ پائلٹ بچ گیا تھا۔ 37 سالہ منیش شکیہ اس لیے بچ سکا کہ حادثے کے وقت طیارے کا کاک پٹ الگ ہوکر دور جا گرا تھا۔
کھٹمنڈو ایئر پورٹ پر ملکی ایئر لائن کا طیارہ 19 افراد کے ساتھ پوکھارا کے علاقائی ایئر پورٹ جانے کے لیے ٹیک آف کر ہی رہا تھا کہ گرگیا۔ ابتدائی خبروں میں بتایا گیا تھا کہ طیارہ ٹیک آف کے دوران رن وے سے پھسل گیا تھا جس کے باعث پائلٹ اُس کی سمت درست نہ رکھ سکا۔
یہ طیارہ مرمت کے لیے لے جایا جارہا تھا۔ ٹیک آف کرتے ہی طیارہ رن وے کے مشرقی حصے میں گرگیا۔ اس حادثے میں صرف پائلٹ بچ پایا۔
نیپال کے بیشتر ایئر پورٹس پر سیفٹی کا معیار انتہائی پست ہونے کے باعث اُسے غیر معمولی تنقید کا سامنا رہا ہے۔ نیپال کے دارالحکومت کھٹمنڈو کے ایئر پورٹ کا محلِ وقوع بھی پائلٹس کی مہارت کا امتحان ثابت ہوتا رہا ہے۔