خرطوم: سوڈان کی حکومت نے جنگجو تنظیم آر ایس ایف پر الزام عائد کیا ہے کہ اس نے ایک گاؤں پر حملہ کرکے 86 افراد کو مار ڈالا ہے۔ آر ایس ایف پر حکومت کی طرف سے آئے دن قتلِ عام کے الزامات عائد کیے جاتے ہیں۔
سوڈان میں گزشتہ برس اپریل سے خانہ جنگ پھر شروع ہوئی۔ ملک کے طول و عرض میں منظم حملوں اور قتلِ عام کے واقعات تواتر سے رونما ہوتے رہے ہیں۔
عینی شاہدین نے بتایا کہ آر ایس ایف کے جنگجو گاؤں میں داخل ہوئے اور اندھا دھند فائرنگ شروع کردی۔ نہتے دیہاتی اُن کا سامنا کرنے کی پوزیشن میں نہیں تھے۔ آر ایس ایف کی سفاکی نشانہ بننے والوں میں خواتین اور بچے بھی شامل تھے۔
سوڈان کی وزارتِ خارجہ نے ایک بیان میں بتایا کہ جنگجوؤں کی فائرنگ کے نتیجے میں 150 سے زائد افراد زخمی بھی ہوئے۔ جنگجوؤں نے گاؤں میں لُوٹ مار بھی کی اور کئی مکانات کو آگ بھی لگائی۔