میرپورخاص (نمائندہ جسارت) ضلع تھرپارکر کے گوٹھ نیپلو کے رہائشی نو مسلم شہربانو نے اپنے شوہر محمد حسن لنجو کے ہمراہ کہا ہے کہ دین اسلام سے متاثر ہو کر اسلام قبول کر کے شریعت کے مطابق شادی کرنے پر رشتے دار جان کے دشمن بن گئے اور کارو کاری قرار دے کر قتل کرنا چاہتے ہیں۔ ان خیالات کا اظہار انہوں نے پریس کانفرنس سے خطاب کرتے ہوئے کیا۔ نو مسلم شہربانو نے کہا کہ اسلام قبول کرنے سے پہلے میرا نام بھاگلی بھیل تھا، میں نے اسلام سے متاثر ہو کر مدرسہ گلزار خلیل میں اسلام قبول کیا اور اب میرا نام شہربانو ہے، اسلام قبول کرنے کے بعد شریعت کے مطابق محمد حسن لنجو سے شادی کی جس کے بعد والد رانو، علاقے کے رہائشی شفیع، احمد، مولا بخش اور دیگر مشتعل ہو کر ہمیں کارو کاری قرار دے کر قتل کرنا چاہتے ہیں، جبکہ انہوں نے میرے شوہر کے گھر کو جلا دیا اور ہمیں قتل کرنے کے لیے تلاش کر رہے ہیں، ہم خوف کے مارے چھپ کر دربدر زندگی گزارنے پر مجبور ہیں۔ انہوں نے اعلیٰ حکام سے مطالبہ کیا کہ معاملے کا نوٹس لے کر ہمیں تحفظ فراہم کیا جائے۔