لاہور: مسلم لیگ ن کے سربراہ اور سابق وزیراعظم نواز شریف کا سعودی عرب کا دورہ غیر متوقع طور پر منسوخ کر دیا گیا ہے۔ ذرائع کے مطابق اس فیصلے کی بنیادی وجہ نواز شریف کی صحت میں خرابی بتائی جا رہی ہے۔
نجی ٹی وی کی رپورٹ کے مطابق طبی حلقوں سے وابستہ ذرائع نے بتایا ہے کہ نواز شریف کے معالجین نے انہیں طویل فضائی سفر سے پرہیز کرنے کی ہدایت کی ہے۔ ان کی صحت کے حوالے سے احتیاطی تدابیر کے تحت، ان کے ذاتی معالج ڈاکٹر عدنان کی نگرانی میں روزانہ کی بنیاد پر طبی معائنے جاری ہیں۔
طبی ٹیم نے نواز شریف کو پیس میکر لگوانے کی تجویز بھی پیش کی ہے، جو ان کی صحت کے مسائل کو مدنظر رکھتے ہوئے ضروری سمجھا جا رہا ہے۔
واضح رہے کہ نواز شریف ہر سال رمضان المبارک کے آخری عشرے میں سعودی عرب میں قیام کرتے رہے ہیں، لیکن اس بار ان کی صحت کی صورتحال کے پیش نظر اس بار وہ سعودی عرب نہیں جا سکے۔ پارٹی کے قریبی ذرائع نے بتایا کہ نواز شریف کی صحت کو پیش نظر رکھتے ہوئے ڈاکٹرز نے انہیں مکمل آرام کی ہدایت کی ہے۔
دوسری جانب ن لیگ کے حلقوں میں نواز شریف کی صحت کے حوالے سے تشویش پائی جا رہی ہے اور پارٹی کارکنان ان کی بہتری کے لیے دعاگو ہیں۔ ابھی تک یہ واضح نہیں ہو سکا کہ نواز شریف کا سعودی عرب کا دورہ کب تک کے لیے ملتوی کیا گیا ہے، لیکن طبی ٹیم کی سفارشات کے بعد ہی کوئی حتمی فیصلہ کیا جا سکتا ہے۔