اسپیشل جج سینٹرل ارجمند شاہ نے توشہ خانہ ٹو کیس میں سابق وزیراعظم عمران خان اور ان کی اہلیہ بشریٰ بی بی کو مجموعی طور پر 17، 17 سال قید اور فی کس 1 کروڑ 64 لاکھ 25 ہزار 650 روپے جرمانے کی سزا سنائی ہے۔
تحریری فیصلے میں کہا گیا ہے کہ استغاثہ اپنا مقدمہ ثابت کرنے میں کامیاب رہا اور دونوں ملزمان خیانت مجرمانہ کے مرتکب پائے گئے۔ عمران خان کو دفعہ 409 کے تحت 10 سال جبکہ انسداد رشوت ستانی ایکٹ کے تحت 7 سال قید کی سزا سنائی گئی، جب کہ بشریٰ بی بی کو بھی 17 سال قید کی سزا دی گئی۔
عدالت نے فیصلے میں واضح کیا کہ مجرموں کی زائد عمر اور بشریٰ بی بی کے خاتون ہونے کی وجہ سے کم سے کم سزا دی گئی، اور ان کے سابقہ عرصہ حوالات کو بھی سزا میں شامل کیا گیا ہے۔ جرمانے کی عدم ادائیگی پر اضافی 6، 6 ماہ قید کا نفاذ ہوگا۔