پاکستان ٹیلی کمیونیکیشن اتھارٹی (پی ٹی اے) نے ہدایت جاری کی ہے کہ تمام موبائل سمز کا صارف کے اپنے نام پر رجسٹرڈ ہونا لازمی ہے۔
پی ٹی اے کے مطابق ہر شہری اس بات کا پابند ہوگا کہ وہ اپنی زیرِ استعمال تمام سمز اپنے نام پر رجسٹر کروائے، جبکہ کسی دوسرے فرد کے نام پر رجسٹرڈ سم کا استعمال قانوناً ممنوع قرار دیا گیا ہے۔ اتھارٹی کا کہنا ہے کہ سم کے کسی بھی غلط یا غیر قانونی استعمال کی مکمل ذمہ داری متعلقہ رجسٹرڈ صارف پر عائد ہوگی۔
پی ٹی اے نے واضح کیا ہے کہ صارفین اپنی سمز اور ٹیلی کام کنکشنز کے استعمال کے خود ذمہ دار ہیں، جبکہ کالز، پیغامات اور ڈیٹا سروسز کے استعمال میں مقررہ ضوابط کی پابندی لازم ہے۔ خلاف ورزی کی صورت میں متعلقہ صارف کے خلاف قانونی کارروائی عمل میں لائی جا سکتی ہے۔
